Í fótspor konungs
Söguslóðaferð í Uppsveitum Árnessýslu
Hér er á ferðinni gönguferð/hjólaferð með þema. Samvinna þriggja ferðaþjónustubænda. Áhersla er lögð á sveitina, sögu og menningu svæðisins sem tengist náttúrunni og heita vatninu órjúfanlegum böndum. Þátttakendur kynnast íslenskri sveitamenningu, sem er einstök og áhersla er lögð á hollustu fyrir sál og líkama. Hreyfing, áreynsla, slökun, hollur matur úr heimabyggð, náttúruupplifun og fróðleikur um sögu. Sérstaða svæðisins er nýtt til hins ýtrasta, gestir kynnast notkun jarðhitans frá ýmsum hliðum. Heitir pottar, sundlaugar og gróðurhús koma við sögu og allur matur, kjöt, fiskur, grænmeti, mjólkurvörur, hverabrauð og bakkelsi kemur úr matarkistu uppsveitanna. Hér er verið að sýna vinsælt ferðamannasvæði út frá öðru sjónarhorni og gildum en venjan er. Skyggnst inn í líf heimamanna fyrr og nú og svæðið upplifað á annan hátt en hefðbundið er. Á þessari leið er ótrúlega falleg fjallasýn og allar helstu perlur uppsveitanna sýnilegar t.d. Langjökull, Jarlhettur, Snækollur, Útfjöllin, Hekla, Tindfjöll, Eyjafjallajökull og þannig mætti lengi telja.
Leiðarlýsing
1. dagur - Gestur kemur sjálfur að Dalbæ í Hrunamannahreppi. Afslöppun í heita pottinum, kvöldverður. Farið yfir skipulag ferðarinnar og dagana framundan.
2. dagur – 15 km
Lagt af stað árla morguns frá Dalbæ og farið um Flúðir, vinalegt sveitaþorp, þar sem íbúar lifa á garðyrkju og þjónustu, gengið um blómlega og fallega sveit með hestum og kúm í haga, þar sem hefðbundinn búskapur er stundaður. Það er ekki sjálfgefið á Íslandi í dag að svo margir bæir séu í samfelldri byggð. Gestir eru sóttir að sveitabænum Haukholtum og ekið til baka í Dalbæ. Slakað á í heitum potti og snæddur kvöldverður. Farið yfir gönguna næsta dag og ef orkan er næg geta gestir skoðað umhverfið við bæinn. Þegar dvalið er á Dalbæ er gaman að ganga á Miðfellið og skoða vatnið uppi á fjallinu. Einnig er hægt að fara í stutta skoðunarferð á álfaslóðir, skoða álfakirkju í túnfætinum, ganga í nágrenninu og fá sér orkuhleðslu úr jörðinni. Á Flúðum er sundlaug og vatnsgufubað. (Það er góður hringur að ganga eða hjóla kringum Miðfellið, Gata-Flúðir-Dalbær).
3. dagur – 15. km
Að morgunverði loknum er gestum ekið að sveitabænum Haukholtum og farangri áfram að Hótel Gullfossi. Gestir ganga sem leið liggur „Kóngsveginn“ um Haukholtaland og um Brúarhlöð.
Brúarhlöð nefnist efsti hluti af 10 km löngum gljúfrum. Hvítá hefur grafið farveg sinn í þursaberg, það er móberg, blandað fremur litlum, köntuðum blágrýtissteinum og í því eru ýmsar klettamyndanir og skessukatlar. Í ánni eru tveir þursabergsdrangar sem kallast Karl og Kerling. Trébrú yfir Brúarhlöð var fyrst byggð árið 1906 í tilefni af heimsókn Friðriks VII Danakonungs til Íslands. Konungur ásamt föruneyti reið yfir brúna við Brúarhlöð.
Síðasta spölinn að Hótel Gullfossi/Brattholti er genginn gamli Kjalvegurinn sem var gamla leiðin upp að Gullfossi. Hvítárgljúfur blasir við og Hvítá í allri sinni dýrð.
Kvöldverður á Hótel Gullfossi/Brattholti, hvíld og slökun í heita pottinum.
Sigríður Tómasdóttir (1871-1957) bjó í Brattholti ásamt fjölskyldu sinni og er hún talin vera fyrsti umhverfissinninn á Íslandi. Hún og systur hennar tóku gjarnan á móti ferðamönnum og fylgdu þeim að fossinum og gerðu m.a. fyrsta göngustíginn að Gullfossi. Í upphafi 20. aldar var mikil umræða um virkjun fossa til að framleiða rafmagn og vildu ráðamenn á Íslandi meðal annars virkja Gullfoss. Sigríður barðist mjög á móti þessum áformum og lagði á sig mikið erfiði í baráttunni og meðal annars hótaði hún að henda sér í fossinn ef hann yrði virkjaður. Að lokum hafði Sigríður betur í baráttunni, Gullfoss var ekki virkjaður og hennar verður ávallt minnst fyrir afrek sitt.
4. dagur – ca 13 km +
Morgunverður. Gengið frá Hótel Gulllfossi að sjálfum fossinum (3km)
Gengið í fótspor Sigríðar í Brattholti meðfram hinu hrikalega Hvítárgljúfri og komið að Gullfossi með sínum fallega regnboga, orku, krafti og fegurð sem engan lætur ósnortinn. Um það bil 40 mínútna gangur. Jarlhetturnar og Langjökull blasa við göngufólkinu í allri sinni dýrð. Gestir skoða sig um að vild en eru svo sóttir og ekið að Hótel Gullfossi aftur.
Þá er lagt í næsta áfanga þessa ferðalags og gengið að Geysi, enn sjáum við sveitina fögru með fjallasýn allt um kring einnig sést vel inn í Haukadal, en þar er lítil sveitakirkja. Þar hafa verið gerðar miklar tilraunir með skógrækt sem hefur gefist mjög vel. Þá er komið að hinum heimsfræga Geysi sem gestir geta notið um stund með sínum ólgandi krafti og sjónarspili á Geyssisvæðinu. Þar eru bökuð hin ljúffengu rúgbrauð sem við gefum gestum okkar. Áhugavert margmiðlunarsafn er í Geysisstofu. Geysir er án efa langþekktasti goshver 
heims, enda er nafn hans notað sem heiti á hverum í ensku. Til eru heimildir um Geysi allt frá 13 öld, en gosvirkni hans hefur verið mismunandi í gegnum tíðina og breytist gjarnan við jarðskjálfta. Þegar Geysir var virkastur voru gosin allt að 60-80 m há.
Gestir skoða sig um og geta brugðið sér í sund. Þeir sem það kjósa geta gengið á Laugafjallið á Geysissvæðinu eða jafnvel inn í Haukadslsskóg. Gestir verða sóttir á Geysissvæðið og ekið aftur að Hótel Gullfossi þar sem bíður þeirra kvöldverður og heitur pottur (nudd ef vill) slökun.
5. dagur – 13 km
Morgunverður, gestum ekið að Múla og þaðan er gengið að Efsta-dal um fjölbreytt og fagurt landslag. Hægt er að ganga gamla veginn frá Múla að Dalsmynni, þar er svo komið inná „Kóngsveginn“. Stoppað ef vill í Úthlíðarkirkju sem er lítil bændakirkja og ef heppni er með hitta menn kannski Björn kirkjubónda. Farið frá Úthlíð að Miðhúsum um veg sem er partur af „Kóngsvegi“ og liggur milli bæjanna, síðan er farið upp hjá fjárhúsunum á sumarbústaðaveginn í Miðhúsalandi og beygt inná „Kóngsveginn“ mjög
fljótlega og hann genginn alla leið að Efsta-dal.
Gönguleiðin er nánast alla leiðina kjarrivaxnar moldargötur. Gengið er til vesturs með Hrútá að Brúará og ánni fylgt til suðurs þar til kemur að göngubrú þar sem Kóngsvegur liggur yfir ána. Á leiðinni þarf að fara yfir nokkra smálæki og Innri-Vallá en hún er ekki vatnsmikil. Við Brúarfoss rennur áin í þröngri sprungu. Sagan segir að áður hafi verið steinbogi yfir Brúará við Brúarfoss en að snemma á 17 öld hafi brytinn í Skálholti látið brjóta bogann til að varna betlaralýð og flökkufólki að komast að Skálholti. Sagt er að brytinn hafi drukknað í Brúará skömmu síðar og fengið þar með makleg málagjöld.
Þegar komið er að Efsta-dal bíður kvöldverður, slökun og heitur pottur. Gestum kynnt hvað í boði er daginn eftir í nágrenninu. Stutt kynning á sögu bæjarins og sagt frá uppsprettum kaldavatnsins í Efstadal svo og kynning á heitavatninu á Efri-Reykjum, sagt frá hvernig það er nýtt meðal annars til húshitunar og ylræktar.
6. dagur
Lokadagurinn runnin upp og margir km að baki í fallegum fjallasal umvafin íslensku vori/hausti í allri sinni dýrð og veðrabrigðum. Morgunverður, frjáls dagur, í boði er hestaleiga á staðnum og fallegar reiðleiðir um nágrennið. Tilvalið að njóta sveitasælunnar á alvöru sveitabæ, kanna bústörf og skoða dýrin. Frjálst val um gönguferðir í nágrenninu t.d. uppá Efstadalsfjall eða ganga upp með Brúará. Brúará kemur upp í Brúarárskörðum sem talin eru hrikalegustu gljúfur í Árnessýslu, 3-4 km á lengd milli Högnhöfða að austan og Rauðafells að vestan.
Stutt er að Laugarvatni þar sem hægt er að sigla og veiða eða bregða sér í nýja náttúrulega gufubaðið Laugarvatn Fontana sem opnar sumarið 2011 og slaka þar á í notalegu umhverfi. Einnig er hægt að bjóða upp á skoðunarferðir t.d. að Friðheimum eða að öðrum ylræktarbæjum þar sem hægt að fá sjá hestasýningu fyrir stærri hópa.
7. dagur heimferð
Á þessum slóðum, innan um ár og læki, hesta, kýr, hunda, hænsni, ilmandi gras og fuglasöng, kemst ferðamaðurinn í góða snertingu við Íslendinga sjálfa yngri sem eldri.
Samstarfsaðilarnir þrír sem standa að ferðinni; Dalbær, Hótel Gullfoss og Efsti-Dalur eru félagar í Ferðaþjónustu bænda. Ferðin er markaðssett í samvinnu við Ferðaþjónustu bænda og bókuð á skrifstofu FB.
Farangur verður keyrður á milli staða og nesti útbúið á bæjunum. Ef gestir óska eftir akstri hluta af leiðunum þá er það hægt og einnig má bæta inn skoðunarstöðum eftir áhugasviði. Sem dæmi eru nokkrar áhugaverðar sveitakirkjur á svæðinu, Haukadalur, Bræðratunga, Tungufell, Hruni, Úthlíð, Miðdalur og Skálholt. Einnig eru möguleikar á að fara í golf, á hestbak eða veiða allt eftir óskum. Leiðin liggur að hluta til um Kóngsveginn og saga hans verður sögð.
Friðrik 8. við Gullfoss árið 1907
Kóngsvegurinn
Heimsókn Friðrik VIII Danakonungs til Íslands árið 1907 var merkur atburður
í Íslandssögunni. Sagt er að konungsheimsóknin 1907 hafi verið mikilvægur hlekkur í
sjálfstæðisbaráttu Íslendinga, en þegar konungur kom skipaði hann nefnd sem átti að semja frumvarp að nýjum stjórnskipunarlögum fyrir Ísland. Íslendingar gerðu allt sem þeir gátu til að taka vel á móti kónginum, en voru um leið að koma að kröfum sínum um aukinn rétt.
Uppnuminn eftir að hafa hrifist af íslenskri nátttúru og fengið konunglegar móttökur sagði Friðrik hin fleygu orð „réttlæti báðum ríkjum mínum til handa „
Farið var í vikulanga ferð um Suðurlandið með 200 manna riddaraliði og konung í fararbroddi. Nokkur hundruð hestar voru fengnir til að flytja menn og farangur, kerrur fyrir tjöld, matföng, ferðakoffort og annan farangur.Í tilefni af konungskomunni höfðu ýmsar vegabætur verið gerðar og lagður vagnfær vegur frá Reykjavík til Þingvalla að Geysi, Gullfossi yfir í Hrunamannahrepp að Álfaskeiði og þaðan að Þjórsártúni. Menn höfðu búist við að konungur myndi ferðast um í vagni, en þegar til kom vildi hann frekar fara ríðandi.
Í þessu stórátak í vegagerð var ekki hægt að notast við annað en handaflið og skóflur og hakar voru helstu verkfærin til að ryðja leið gegnum hraun og kjarrlendi. Kostnaður við „Kóngsveginn“ varð um 14% af ársútgjöldum ríkissjóðs.
Verð: kr. 123.200 pr mann í tveggja manna herbergi
Innifalið:
6 nætur, gisting og morgunverður (4 nætur herb. með baði og 2 nætur herb. án baðs)
5 nesti
6 kvöldverðir
akstur skv. leiðarlýsingu
Brottfarir: 9.09 – 20.09 – 01.10.2011
Ferðirnar eru bókanlegar í gegnum Ferðaþjónustu bænda á ifh@farmholidays.is
